Nipilersuutinik immiussinermut paasissutissat
Nina immiussisoq/Nina i studiet
Demo-t 30-40-llu akornanniittut ukiumut Atlantic Music ApS-imut nassiunneqartarput, tassa saqqummersitserusullutik saaffiginnittut tusarnaagassatut nassiussaat. Saqqummersitserusuttullu amerliartuinnavipput, aammami atortorissaarutit nutaat tamanna ilaatigut oqinnerulersinnikuuvaat. Piginnaanilissuarnillu nunarput qalaarmat, saqqummersitsiviit immiussisarfiillu piukkunartunik ujaasiniarneq ajornartorsiutigineq ajorpaat. Demo-millu nassiussinerup kingorna itigartitsisoqarsimappat inuit ilaasa aamma paasiuminaatsittarpaat.
Nunatsinni saqqummersitat angerlarsimaffinni immiussat, ukiut kingulliit tallimat amerliartuinnavissimapput, ullutsinni qarasaasianut atoruminarsakkat atorlugit, ajunngivissunik inernilinnik immiussisoqarsinnaalersimammat.
Taamaammat allat sinnerlugit aamma saqqummersitsisarsimavugut, tamakkulu siammarterissussinertut taaneqartarput, tassani immiussisarfeeqqat Atlantic Music ApS-ilu suleqatigiillutik, aningaasartaanut tunnganerusut, aammali angerlarsimaffinni immiussat inaarsaataasumik nipigissaqqinnissaanut isumaqatigiissusiortarput.
Nipilersortartut immiussisarfeeqqallu namminneq naqiterisitsinissamut siammarterinissamullu akissaqartannginnerat takornartaanngilaq, aammami aningaasaliissuterpaaluit atoqqaarlugit tuniniaaneq aallartittarmat. Taamaammat oqartoqarsinnaavoq saqqummersitsisarfiit Atlantic Music ApS-itut ittut bankitupajaaq inissittartut, ajutoornermilu kisiartaallutik aningaasaajartussanngortarlutik.
Taamaammallu aningaarsartuutigisimasat tamakkerlutik utereeraangata aatsaat sinneqartoorneq pilersarpoq, taakkulu isumaqatigiissutaasimasut malillugit suliamut akuusut akornanni avinneqartarput.
Saqqummersitsinermi aningaasartuutaasartut suliamiit suliamut assigiinngiiaartaqaat, immiussisarfimmi piffisaq atorneqartoq, nittarsaassineq, allallu aningaasartuutit apeqqutaasarmata. Saqqummersitarlu tunisakilluni aningaasatigut amigartoorutaassappat, nipilersortartut akiliisussanngorneq ajorput, amigartoornermimi Atlantic Music ApS-i kisimi matussusiisussaasarpoq.
Taamaattumillu saqqummersitsiviup tungaaniit assigiinngitsunik isumaqatigiissutaasussanik piumasaqaateqartarpoq. Paarlattuanik soorunami nipilersortartut tungaanniit piumasaqaataasut aamma isumaqatigiissutigineqartarput.
Allatut oqaatigalugu, tassa nipilersortartut namminneq pilliuteqarnerunikkut oqaasissaqarnertik annertusarsinnaavaat, taamaaliornikkummi saqqummersitsiviup nammatai annikillissammata.
Nipilersortartutut pinngortitserusunneq nipilersukkanillu siammaarusunneq, immiusserusunnermut tunngaviusariaqarnerat ilisimasariaqarpoq, aningaasatigummi iluanaarasuarnissaq kisiat naatsorsuutiginaveersaartariaqarpoq.
Isumallualerpallaartigani nunatsinni atugassarititaasut ilisimaarinissaat pingaaruteqarpoq, nunatsinnimi amerlannginnatta, pisisussat killeqarput.
Unioqqutitsilluni sanaqqittanik ingerlatitseqqiisarnerup, akeqanngitsumillu internetsikkut aalliinnartarnerup kingunerisaanik, nunatsinni avataanilumi nipilersortartut tusarnaartitsinerit aningaasarsiorfissatut periarfissatuaripajaarpaat..
Danmarkimi nunanilu allani siammarterinermut assigisaanullu aningaasartuutit isumannaarusullugit, saqqummersitsiviit nipilersortartut akissarsiaannit procentinik piumasaqartalernerat takornataajunnaarpoq. Qujanartumilli pissutsit tamakku nunatsinni takussaanngillat.
Nipilersornerup silarsuaani atugassarititaasut imaannaanngitsut atuupput, immiusserusuttuulluni tamanna ilisimaarisariaqarpoq.
Saqqummersitat sinneqartoortuaannanngillat. Amigartoornerit annikitsuaraannarmilluunniit sinneqartoornerit nipilersortartunit tupaallaatigineqartoq Atlantic Music ApS-imi arlaleriarluta takusarparput. Ajoraluartumilli piviusoq amerlanertigut taamaattarpoq.
Nipilersoriaatsit assigiinngiiaat imminnut akilernissaminnut tunisariaqagaat assigiinngiiaarput. Nipilersortartut ilaat immiussinerminni aningaasartuutikittut 500-nik tunisereeraangamik sinneqartuulersarput, allallu aningaasanik atuinerusimasut 3.000-nik tuniseqqaarlutik sinneqartoorsinnaanngortarlutik, tamanna nipilersortartup saqqummersitsiviullu siunnerfigisimasaat apeqqutaallutik allanngorartarpoq.
Atlantic Music ApS-imi immiussanut aningaasartuutit suliamiit suliamut assigiinngiaartaqaat, tassa nipilersoriaaseq, pisisussatut anguniakkat, kiisalu iliuusissatut aalajangiussimasat apeqqutaasarput, assersuutigalugu nunatta avataanut tuniniagassatut suliaasimasoq 1 million koruunit tungaanut akeqarsimavoq, allallu suliat 50.000 koruunit tungaannaanut akeqarsinnaasarlutik.
Taamaammat nunatsinni nipilersortartutut suliatigullu imminut nittarsaasseqataanissaq pingaaruteqarluinnarpoq, qujanartumillu internetsi atorlugu ullutsinni periarfissat oqinnerulernikooqaat.
Demo-t
Tupaarnaq pulaartoq/Tupaarnaq gæster kontoret
Nipilersortartut nipilersoqatigiillu immiusserusullutik Atlantic Music ApS-imut saaffiginnittut, aalajagiinissamut atugassamik demo-mik tunniussinissaat piumasaqaataasarpoq.
Demo-liarlu CD-tut, USB-tut Harddisc-imiittutulluunniit tunniunneqarsinnaavoq. Erinnallu amerlassusaat allanngorarsinnaalluni, erinnalli 9-at 12-llullu akornanniikkunik saqqummersitsiviup nalilersuiniarnera oqinnerusarpoq.
Demo-p nassiunneqartup kopiiunissaa pingaaruteqarpoq, nammineerlutit originaleq tigummiinnassavat, tassami Atlantic Music ApS-ip nassiunneqartoq akisussaaffiginngilaa, saaffiginnissullu itigartitsinermik kinguneqarpat demoq nassiunneqartoq atorsinnaajunnaarlugu aserorneqartarpoq.
Nipilersortartup nassiussani illersorsinnaasariaqarpai, nipilersoriaaserlu ataqatigiissoq atorneqaruni, nipilersortartup oqaatiginiagaa anguniagaalu saqqummersitsiviup tungaaniit paasiuminarnerullunilu aalajangiiffigiuminarnerussaaq. Eqqaamasariaqarporlu sumut saaffigineqarsinnaaneq nassiussanut ilanngunneqassammat.
Immiussinissamut saqqummersitsinissamullu aalajangiiniarnermut Atlantic Music ApS-imi inuit pingasut-sisamat peqataasarput.
Demo-mik tunniussiffiup nalaani nipilersoriaatsimik assingusumik saqqummertoqaqqammerpat, assingusumilluunniit suliaqarnissamik saqqummersitsivik pilersaaruteqareerpat, tunniussisumut sunniuteqaratarsinnaavoq.
Taamaammat nipilersortartut itigartitaasimagunik nuannarineqannginnermik tunngaveqartariaqanngitsoq ilisimasariaqarpaat, saqqummernissamut piffissaq akunnattoq toraarneqarsinnaasarmat.
Tamannalu takornartaanngimmat, saaffiginninnikut saqqummersitsiviit allat aqqutigalugit saqqummertut takusarpagut. Qujanaqaarlu saqqummernissamut periarfissat arlaqarmata.
KODA
Saqqummersitsivimmut sumulluunniit attuumassuteqaraluaraanni, Atlantic Music ApS-imiit nipilersortartut kikkulluunniit siunnersorusuppagut KODA-mut ilaasortanngoqqullugit.
Kattuffik KODA nunatsinni tassatuaavoq nipilersortartut suliaannik atuisoqartillugu nipilersortartunut ajunngitsorsiassanik akiliisitsisartoq.
Ukiorpassuarni KODA-mut akiliuteqaqqaarnani tusaatini assigisaannilu kalaallit nipilersuusiaat nipilersortartunut piginnittunut annaasaqaataasumik appisimaarneqartarsimapput, Atlantic Music ApS-illi uteriiserneratigut KODA sukaterivoq, nipilersuutillu Radiomi TV-milu appisimaarneqartartut sianigineqarnerulerput, sulili tusaatiniit takusassiivinniillu nalunaarutigineqartartut amigartarput, nipilersortartullu peqqusersusaarfigineqartutut sanioqqunneqartutullu misigisut amerlaqaat.
Siornatigorniilli pitsanngoriarnikooqaaq, qujanartumillu suli pitsanngorsarniarneqarluni.
Tusaatiniit, takusassiivinniit, appisimaarsimanerniillu appisimaakkat nalunaarsorneqarneri Atlantic Music-ip pisinnaasani tamaat pissarsiariniartarpai. Oqitsuinnaanerli ajorpoq, tassanilu saqqummersitsiviup nipilersortartullu suleqatigiilluarnissaat pisariaqarpoq.
Assersuutigalugu nipilersortartut appisimaarsimaneri tamakkerlugit saqqummersitsiviup ilisimaneq ajorpaat, nipilersortartorpassuillu ilisimanngilaat appisimaarnermi tusarnaartut amerlassusaat tunngavigalugit KODA aqqutigalugu akissarsisinnaagamik.
Tusarnaartitsinernik aaqqissuisartut ukiorpassuarni KODA-mut akiliuteqaratik aaqqissuisarsimapput, Atlantic Music-illi suliniuteqarneratigut nipilersukkat appisimaarneqartut, nipilersortartunit akissarsissutigineqarsinnaanngorlugit nalunaarsorneqartalernikuupput.
Neriuutigiinnassuarput siunissami tusarnaartitsinernik aaqqissuisartut tamakkerlutik, tusarnaartitsinerni nipilersukkat atorneqartut KODA-mut nalunaarutigalugillu akilernissaat pisussaannartut ingerlatilerumaaraat.
NCB
NCB - Nordisk Copyright Bureau-mik naalisaaneruvoq, saqqummersitsinnginnermi akileraartarfiuvoq erinniortut taalliortullu suliaqarsimanerminnik pissarsiffigisartagaat. Akileraarullu Namminersorlutik Oqartussaniit piorsarsimassutsikkut tapiissutitut akilerneqartarpoq.
NCB-miit akissarsiassat saqqummersitsinerup ukiumut sisamariaq aningaasat erinniortunut nakkartinneqartarput.
Nipilersortartut iluaqutissaannik Kulturikkut aqutsisoqarfimmi NCB-mut akiliutaasartussanik aaqqiissuteqartoqarpoq. NCB-miillu akissarsiassat amerlassusaat, nuuteeqqat naqinneqartut amerlassusaannit aalajangerneqartarpoq. Taamatullu aaqqiineq nunatsinni saqqummersitsivinnut tapersiutissatut eqqarsaataavoq.
Ukiorpassuit siulliit ULO kisimiilluni taperneqartarpoq, maannali saqqummersitsiviit arlaqalermata tapiisarneq allanngortinneqarnikuuvoq, ullumikkullu saqqummersitsiviit naqiterisitsiniarlutik NCB-mut akiliutigisimasatik, aningaasanut inatsimmi aningaasassaqartinneqaraangat utertissinnaasarpaat. NCB-mut akiliuteqaqqaartigani naqiterisitsisoqarsinnaanngilaq.
Taamaalilluni tapiisarnermut peqqussut piffissap ingerlanerani arlaleriarluni allanngortinneqartarsimavoq, peqqussutip saqqummersitsivinniit assigiinngitsumik paasineqarlunilu atorneqartarnera allannguinernik malitseqartarsimavoq. NCB-mut akiliutit taarserneqartarneri peqqussummi saqqummersitsivinnut tapiissutitut aaqqissuussaammat, Atlantic Music ApS-imi saqqummersitat ataasiakkaat naatsorsuusiornerini aningaasartuutitut allaqqasarnikuupput.
Kultureqarnermut pisortaqarfiup 2008-mi allagaqarnerata kingorna allannguisoqarpoq, Atlantic Music ApS-illu naatsorsuusiaani tamani, NCB-mut akiliutit aningaasartuutitut allaqqajunnaarsillugit allanngortinneqarput.
Naak nutaamik peqquneqarneq atulerfimminiit qaangiutereersunut atuutinngikkaluartoq, taamani Namminersornerullutik oqartussaasimasuni inatsisinik paatsuungasitsisoqarnera nipilersortartunut kingunerlutsisimammat, naatsorsuutit nipilersortartunut naapertuilluarninngorlugit ukiut tallimat kingumut allannguiffiginiarlugit Atlantic Music-i aalajangerpoq.
Ukioq 2008 naatsorsuutiginngisanik aningaasartuuteqarfiulluni suliffeqarfimmut unamminarsimaqaaq. NCB-mut akiliutinut tapertittarneq pillugu inatsit saqqummersitsivinnit arlariinnit paatsoorneqarluni atorneqarsimavoq, maannali Atlantic Music ApS-imi tamanna aaqqiivigineqarnikuuvoq.
Aammali saqqummersitsiviit atugaat taamaalillutik suli unamminarninngorput, nipilersortartulli naqitikkat amerlassusaat malillugu piginneqqaartussaasutut aningaasarsiassatik suli pissarsiarisarpaat. Massakkut 1.000-t tungaanut naqiteqqaarnerit akileraarutai Kultureqarnermut pisortaqarfimminngaanniit tapiiffiginneq atuuppoq. Amerlanerusumik naqititsissagaanni nammineq immiussisarfittut akiliisariaqartarpoq tapiiffigiteqqissinnaananilu.
Atlantic Music Saqqummersitsivik (Forlag)
Nipilersortartut soqutigisaannik illersuisumik, tassa suliaasa radiomi, TV-mi tusarnaartitsinernilu appisimaarneqartut pissusissamisoortumik nalunaarsorneqarlutillu akilerneqartarnissaannik suliaqartartumik Kalaallit Nunaani kattuffeqanngilaq. Taamaattoqanngineralu pissutigalugu Atlantic Music-i immikkoortortaqarfimmik tamakkuninnga suliaqartussamik aallartitsivoq.
Tassuunalu Atlantic Music-ip nukippassuit piffissarlu annertooq atortarpaa, nipilersuutit assigiinngitsutigut atorneqarnerisa, eqqortumik nalunaarutigineqarlutillu akilerneqartarnissaat isumagalugu.
Tamannalu pissutigalugu saqqummersitsilernermi saqqummersitsiviup sulinerminut agguagarsisussanngorlugu isumaqatigiissusiortoqartarpoq.
Allaffissornermut, isumaqatigiissusiornernut assigisaanillu suliaqarnermi Atlantic Music-ip nipilersortartut piginnittuutitaaneranit nunatsinni 20%-it, nunattalu avataanut tunngasuni 33,33%-inik piumasaqartarpoq.
Nipilersortartup saqqummersitsiviullu suliniarnerat pimoorussinerallu apeqqutaalluni, isumaqatigiissutit taamaattut suliamiit suliamut assigiinngitsunik sivisussusilerneqartarput.
Ataasiarluni suliffeqarfik nittarsaassiniarmut assigisaanullu aningaasanik ima annaasaqarnikuutigaaq, ukiorpassuarni nipilersortartut piginnittuutitaanerannit agguarsisarnissamik isumaqatigiittoqarsimalluni, taamaaliornikkut aningaasartuutigisimasat piffissap ingerlanerani utersinnaanissaat neriuutigineqarluni.
Tassa isumaqatigiissutip atuunnerani nipilersortartut tusarnaartitsigaangamik, nipilersuusiaallu atorneqaraangata aningaasat isertinneqartut ilaat aningaasartuutaasimasut matuniarnerinut iluaqutaasarput. Eqqaamaneqarsaarli aningaasat ilaannai saqqummersitsivimmut tuttarmata, nipilersortartummi soorunami aamma agguagarsiassatik tigusarpaat, naak suli amigartoorneqaraluartoq.
Taamaaliornerlu pisariaqalersarpoq nipilersortartut aningaasatigut ima taperserneqartigigaangata, suliffeqarfiup aningaasartuutigisani isumaqatigiissusiornermi sillimmarniartariaqalerlugit. Eqqaamajuartariaqarporlu isumaqatigiissutit atorfeqarmata, tassalu eqquutsinneqarnissartik. Isumaqataagaannilu aatsaat atsiortoqassaaq.
Isumaqatigiissuteqarnerullu pitsaaqutigaa tusarnaartitsinerniit, tusaatini allatigullu nipilersuusiat atorneqarnerinit nipilersortartut saqqummersitsivillu tamarmiullutik pissarsisarmata.
Tassa nuusiorfiup nipilersuusiat atorneqarnissaat soorunami sulissutigisarpaa, nipilersortartullu tusarnaartitsinerniit erinnat atukkat KODA-mut nalunaarutigineqarnissaat suleqataaffigisarpaat.
Isumaqatigiissuteqarnikkut aamma nipilersortartut suliaasalu atornerlunneqaratik illersorneqarnissaat sillimmarneqartarpoq.
2011-mi Atlantic Music-i Discovery Channel-imit attavigineqarpoq, taakku kalaallit nipilersuusiaat assigiinngitsut toqqartorsimasatik, aallakaatitassiassani atorusullugit saaffiginnipput.
Isumaqatigiissut taamaattoq immikkuullarissuuvoq, pineqartumilu Atlantic Music-ip nipilersortartut tamakkerlutik akissarsinissaat isumagaa.
Nunatta avataanut taamaattunik isumaqatigiissusiornerit piffissatornartarput, pissutsillu allat atuussinnaasarmata isumaqatigiissusiat inatsisilerituunik misissoqqissaarneqartarput, tamannalu soorunami aamma aningaasanik akeqarpoq.
Aningaasartuuteqartarnerillu tunngavigalugu, Atlantic Music-ip 33,33%-inik pissarsinissani piumasaqaatigisarpaa.
Nipilersortartut ilaat isumaqatigiissusiortoqartinnaguluunniit nipilersukkat atukkiunneqarnissaat piumasarigaluarpaat, pissusissamisoortumilli suliarineqarnerata kingorna akissarsititaanertik ullumikkut nuannaarutigivaat.
Nipilersortartorpassuit Atlantic Music-ikkut saqqummernikuunngitsut, erinnat taallallu suliarisimasatik atorneqartillugit eqqortumik akilerneqarlutillu illersorneqarnissaat qularnaarusullugu, Atlantic Music-imut immikkut isumaqatigiissusiortalernikuupput.
Naliginnaasuuvorlu Atlantic Music-ikkut saqqummersitsinissamik isumaqatigiissutillit aamma suliamik eqqortumik illersorneqarnissaannut isumaqatigiissusiorfigineqartarnerat. Illuatungeriit ataatsimoorlutik soqutigisaat tassani pineqarmat.
Siammartiterineq
Saqqummersitsivik Kalaallit Nunaanni immiussisarfeeqqat immiussaannik inaarsaanermik, kinguneratigullu siammarterinermik ikiortarpai.
Atlantic Music ApS ullumikkut nuusiorfiit ULO, Melos, immiussisarfeeqqallu arfineq pingasut nuna tamakkerlugu siammarterissuppai.
